కవి సమ్మేళనాలు నాంది పలికిన అంతర్వేది ప్రపంచ తెలుగు కవితోత్సవం
పలు రికార్డ్ బుక్ లలో నమోదు కాబడిన సాహితీ ప్రస్థానం
తొలి తెలుగు ప్రపంచ కవితోత్సవం ఒక నివేదిక
ఇటు సముద్రం … అటు గోదావరి కలిసే సాగర సంగమం ప్రదేశం అంతర్వేది నందు 2015అక్టోబర్ 17, 18 తేదీలలో నిర్వహించిన ప్రపంచ తెలుగు కవితోత్సవం సాహితీ చరిత్రలో ఒక మైలురాయి . సుమారు 2000 మంది కవులు ఒకే వేదికపై ఏకధాటిగా 30 గంటల 30 నిముషాల 30 సెకన్లపాటు కవితాగానం చేయడం అనేక రికార్డులు సృష్టించినట్టయ్యింది . సాహితీ చరిత్రలో కనీవినీ ఎరుగని ఒక సాహిత్య పయనం గా అంతర్వేది ప్రపంచ కవితోత్సవాన్ని చెప్పవచ్చు , తూర్పుగోదావరి జిల్లా సఖినేటిపల్లి మండలంలోని అంతర్వేది అనే మారుమూలగ్రామం లో అత్యంత ప్రసిద్ధి చెందిన శ్రీ లక్ష్మినరసింహస్వామి ఆలయ సమీపంలో ఈ ప్రపంచ కవితోత్సవాన్ని తొలిసారిగా నిర్వహించారు ..ఈ సమ్మేళనంలో పాల్గొనేందుకు హైదరాబాద్ మరియు ఇతర సమీప ప్రాంతాలకు చెందిన కవులు ప్రత్యేకంగా ఒక రైలు బోగీని రిజర్వేషన్ చేసుకుని రావడం ఇంకా విశేషంగా చెప్పవచ్చు . 30 గంటలు అనుకున్న కవి సమ్మేళనం కవులు ఎక్కువగా రావడంతో 32 గంటలు పాటు సాగింది . అన్ని ప్రాంతాలనుండి కవులు హాజరయ్యారు .
ఎందరో వర్ధమాన కవులకు ఈ ప్రపంచ కవితోత్సవం వేదిక ఒక దిక్సూచిగా నిలిచింది .చాలామందికి కవిత్వపు ప్లాట్ పామ్ గా నిలిచింది . ఎందరికో పేరు తీసుకొచ్చింది .
ప్రముఖ కవి, రచయిత ప్రభుత్వ జాషువా పురస్కార గ్రహీత ,సాహిత్య అకాడమీ సభ్యుడు (పూర్వ) డాక్టర్ కత్తిమండ ప్రతాప్ కన్వీనర్ గా నిర్వహించిన ఈ ప్రపంచ కవి సమ్మేళనం ఒక పండుగలా సాగింది .
కవులందరికి రుచికరమైన వంటకాలు , టిఫిన్లు , సాయంత్రం పూట పకోడీలు…. అస్సలు ఉదరం ఖాళి లేని విందుకు కవులందరూ ఫిదా అయ్యారు . ఉండేందుకు అందరికి వసతి సౌకర్యం కలించారు . ఇలా అన్ని వసతులు సమకూర్చారు . అప్పట్లో కవి సమ్మేళనం అంటే ఒక నలభై లేదా యాభై మందితో జరిగేవి . తొలిసారిగా ఇంతమంది కవులతో కవి సమ్మేళనం నిర్వహించడం తన జీవితంలో చూడలేదని ప్రముఖ కవి స్వర్గీయ అద్దేపల్లి రామ్మోహనరావు సభలో ఆశ్చర్య ప్రసంగం చేయడం ఇప్పటికి మరుపురానిది . ఎక్కడ చూసినా కవులతో కవిత్వంతో అంతర్వేది మార్మోగింది .
పలు సాహితీ సంస్థలు ఈ కవి సమ్మేళనంలో ప్రముఖ పాత్ర వహించాయి . విశేషం ఏమిటంటే ఒక్కొక్క కవితా ఆవృతానికి ప్రత్యేకించి లాటరీ నిర్వహించి కవులకు బహుమతులు అందించడం జరిగింది . కవి సమ్మేళనంలో అతిధులుగా ప్రముఖులు కేంద్ర సాహిత్య అవార్డు గ్రహీత శివారెడ్డి ,పొట్లూరి హరికృష్ణ పద్మ భూషణ్ బోయి భీమన్న సతీమణి బోయి హైమావతి , ప్రసాదమూర్తి , తోపుడుబండి సాదిక్, శిఖామణి, దాట్ల దేవదానం రాజు , గిడ్డి సుబ్బారావు , అప్పటి ఎమ్మెల్యే గొల్లపల్లి సూర్యారావులు అతిధులుగా హాజరయ్యారు . ప్రముఖ కవులందరూ ఒక్కో సెషన్ కి విశిష్ట అతిధులుగా ఉన్నారు .
అంతర్వేది ఒక సాహితీ కెరటంలా ఉప్పొంగినట్టయ్యింది . వేలాది కవితా గొంతుకలు కవిత్వాన్ని వినిపించాయి . ఎన్నో గొంతుకలు తొలి వేదికగా అరంగేట్రం చేశాయి . వేదికపై పలు పుస్తకాలు ఆవిష్కరించారు . భారత్ బుక్ ఆఫ్ రికార్డ్ , వర్మ బుక్ ఆఫ్ రికార్డ్ , ఆంధ్రా బుక్ ఆఫ్ రికార్డ్ , తెలుగు బుక్ ఆఫ్ రికార్డ్ ఇలా అనేక రికార్డుల్లో ఈ కవి సమ్మేళనం ఒక ప్రపంచ రికార్డుగా నమోదు కాబడింది ఇదొక సాహిత్య వింతగా నిలిచిపోయింది.
కువైట్ ఎన్నారై టీమ్ ప్రత్యేక యూనిఫామ్ లో సేవలందించడం డాక్టర్ ప్రతాప్ నేతృత్వంలో కవులందరూ కవితా పఠనం చేయడం , పాల్గొన కవులందరిని మెమెంటో శాలువా మరియు డాక్టర్ ప్రతాప్ రాసిన రాలిపోయే కాలం కవితా సంకలనం ఇచ్చి ఘనంగా సత్కరించడం జరిగింది . . విశిష్ట అతిధులుగా విచ్చేసిన సీనియర్ కవులందరూ కవితా గానం చేశారు . సాహిత్య దిగ్గజాలందరు ఆవృత్తాలు నిర్వహించారు . ఇది మరుపురాని మధురానుభూతిగా చెప్పవచ్చు . ఆ తర్వాతే కవి సమ్మేళనాలు విరివిగా ఏర్పాటు చేయడం , కవులను గుర్తించడం తో పాటు కవి సమ్మేళనాలకు ఎక్కువ గుర్తింపు వచ్చింది అని చెప్పడంలో సందేహం లేదు .
